झापा, असार ६ । समाज कल्याण परिषद्लाई सातै प्रदेशमा विस्तार गरिने भएको छ । आज बसेको परिषद्को बोर्ड बैठकको कार्य सञ्चालन समितिले गरेको उक्त निर्णय अनुमोदन गरेको हो ।महिला, बालबालिका तथा ज्येष्ठ नागरिक मन्त्री तथा परिषद्का अध्यक्ष भगबती चौधरीको अध्यक्षतामा बसेको बैठकले सेवाग्राहीलाई सहजरुपमा सेवा प्रवाह गर्न सकियोस् भन्ने उद्देश्यले प्रदेश तहमा पनि परिषद्को कार्यालय स्थापना गर्ने कार्य अगाडि बढाएको हो ।
उक्त कार्यका लागि परिषद्ले सम्भाव्यता अध्ययन टोलीसमेत खटाएको छ । बैठकले परिषद्लाई थप व्यवस्थित गर्नका निम्ति डिजिटलाइजेशनमा लैजाने प्रक्रिया अगाडि बढाउने निर्णयसमेत गरेको छ । मन्त्री चौधरीको पहलमा परिषद्को कामकारबाही थप व्यवस्थित गर्न डिजिटलाइजेनशनमा लैजान यसअघि परिषद्लाई निर्देशन दिइकी थिइन् ।
साथै, बैठकले परिषद्का पदाधिकारीहरुको कार्य विभाजनसमेत परिवर्तन गरेको छ । जसअनुसार अध्यक्ष र सदस्य सचिवमा निहित अधिकारहरु उपाध्यक्ष, कोषाध्यक्ष र बोर्डका सदस्यहरुलाई अधिकार प्रत्यायोजन गर्न प्रक्रिया अगाडि बढाएको छ ।
