झापा, असार ११ । वर्षासंगै परेको चट्याङले लागेर ६ जनाको मृत्यु भएको छ ।
झापामा दुई , रोल्पामा दुई तथा दाङ र बर्दियामा एक–एकजनाको ज्यान गएको हो । झापामा चट्याङले लागेर दुईजनाको मृत्यु भएको छ ।
आज बिहान वर्षासंगै परेको चट्याङले लागेर गौरीगञ्ज र कमलमा एक–एकजनाको मृत्यु भएको हो । मृत्यु हुने दुवैजना पुरुष हुन् ।बिहान ८ः४५ बजेको समयमा गौरीगञ्ज गाउँपालिका वडा नं.३ ठेकिटोला बस्ने सिताराम दाहालको खेतबारीमा धानको बीउ उखाल्ने क्रममा .गौरादह नगरपालिका वडा न. ८ बस्ने अन्दाजी ४२ वर्षका लिला भन्ने विकास गिरीको चट्याङले लागेर घटनास्थलमै मृत्यु भएको हो ।
त्यस्तै कमल गाउँपालिकामा चट्याङले लागेर एकजनाको मृत्यु भएको छ ।
आज बिहान ७ बजेको समयमा कमल गाउँपालिका वडा नम्वर २ समाईगढ बस्ने ४६ वर्षीय राजन खड्काको चट्याङले लागेर मृत्यु भएको हो । आफ्नै घरबाट खेततर्फ जाने क्रममा अचानक परेको चट्याङले लागेर घाईते भएका खड्कालाई उपचारको लागि आम्दा अस्पताल दमक लगिएकोमा बिहान ७ः४५ बजे अस्पताल पुर्याउनासाथ चिकित्सकले मृत घोषणा गरेको जिल्ला प्रहरी कार्यालयले जनाएको छ ।
त्यस्तै रोल्पामा सुतेकै ठाउँमा चट्याङले लागेर दुईजनाको मृत्यु भएको छ । रोल्पाको सुनछहरी गाउँपालिका ३ तान्जा बस्ने २२ वर्षीया जाइता घर्ती मगर र १४ वर्षीया गोमला घर्तीमगरको चट्याङले लागेर घटनास्थलमै मृत्यु भएको हो ।
त्यस्तै दाङको तुलसीपुर उपमहानगरपालिका ४ थाप्रेमा एक १० वर्षीय बालकको मृत्यु भएको छ । आँगनमा खेलिरहेका १० वर्षीय सुवास विकको चट्याङले लागेर मृत्यु भएको हो ।
त्यस्तै बर्दियाको गेरुवा गाउँपालिका ३ गणेशपुरका २२ वर्षीय रोहित थारुको पनि चट्याङले लागेर मृत्यु भएको छ । खेत जोतिरहेको अबस्थामा उनलाई चट्याङले लागेको थियो ।
