झापा, असार २३ । भद्रपुर–१० लेखनाथ चोकमा घरबाटै सिटी सफारी चोरी भएको छ ।
![](https://pratidindaily.com/wp-content/uploads/2024/07/450221633_3823120294634751_8244222839830790381_n.jpg)
गएराति लेखनाथ चोक निवासी रमेश चम्लागाईको घरको कम्पाउन्डबाट चार्जमा राखिएको प्र १–०१–०२ ह ३२२४ नम्बरको निलो नयाँ सिटी सफारी चोरी भएको हो । चार्जको तार काटेर चोरी गरेको पीडितले जनाएका छन् ।
झापामा यसअघि पनि अटो र सिटी सफारी चोरी भएको छ । जिल्लामा साना सवारीसाधन मोटरसाइकल मात्र हराउने गरेका छैनन्, ठूला ट्रयाक्टरसमेत चोरी भएको घटना छ ।
जिल्ला प्रहरी कार्यालय झापाको तथ्यांक अनुसार चालु आर्थिक वर्षको साउन १ देखि जेठ १३ सम्म जिल्लामा जम्मा २२ वटा सवारीसाधन चोरी भएका छन् । जसमध्ये मोटरसाइकल १८ , ट्रयाक्टर, अटो ,सिटी सफारी र स्कुटर एक–एक वटा रहेका छन् । चोरीमा संलग्न २६ जनालाई पक्राउ गरी कार्वाही गरिएको झापा प्रहरीका प्रवक्ता डीएसपी कृष्णकुमार चन्दले बताए ।
गत चैत १९ गते गौरीगञ्जमा ट्रयाक्टर चोरी भएको हो ।गौरीगञ्ज गाउँपालिका–१ मा स्थानीय होम थपलियाले आफ्नै घर अगाडी पार्किङ गरी राखेको मे १ त ७७६५ नम्बरको ट्रयाक्टर चोरी भएको थियो ।
चोरी भएको ट्रयाक्टर खोजतलासमा खटिएको प्रहरी चौकी कुञ्जीवारीको टोलीले गौरादह नगरपालिका–९ का ३५ वर्षीय सुनिल टुडूले भारततर्फ लाँदै गरेको अवस्थामा नियन्त्रणमा लिएको डीएसपी चन्दले जानकारी दिए ।