हल्दिवारी , पुष २७ । ढडुवा युवा क्लब हल्दिवारी–३ को आयोजना तथा हल्दिवारी ३ नं वडा कार्यालयको सहयोगमा वडा नं–३ स्तरीय पुरुष भलिबल प्रतियोगिता सम्पन्न भएको छ ।
हल्दिवारी वडा नं–३ भित्रका ९ वटा टिमको सहभागिता रहेको प्रतियोगितामा बिष्ट भलिबल टिम प्रथम र मेचे भलिबल टिम दोस्रो भएको छ । त्यस्तै बिष्ट भलिबल टिमका बिशन बिष्ट उत्कृष्ट खेलाडी घोषित भएका छन् । ढडुवा युवा क्लबका अध्यक्ष कुलबहादुर न्यौपानेको अध्यक्षता तथा हल्दिवारी ३ का वडा अध्यक्ष बिष्णु ओलीको प्रमुख आतिथ्यमा भएको समापन कार्यक्रममा वडा सदस्यहरु कर्ण भण्डारी ,अजित बिष्ट , बिष्णुमाया तिम्सिना ढुङ्गेल ,सामाजिक अगुवा ओमप्रसाद मिश्र,रातमाटे सामुदायिक वनका अध्यक्ष जनक लामा,रणकाली सामुदायिक वनका अध्यक्ष धनबहादुर साँवा,पञ्चायत माध्यमिक विद्यालयका शिक्षक डिल्लीराम ढुङ्गेललगायतको आतिथ्य रहेको थियो ।
बढदो दुर्व्यसनी र लागूऔषधजस्ता समस्याको न्यूनीकरण गर्दै भलिबल खेलको विकास गरी वडाको खेलाडी छनौट गर्न सो प्रतियोगिता आयोजना गरिएको आयोजकले जनाएको छ । कार्यक्रमको संचालन क्लबका सचिव अभिषेक खतिवडाले गरेका थिए ।
