बिर्तामोड,फागुन १३ । वीरता लेडी जेसीजले मेचीनगर– १२ स्थित माधव संस्कृत विद्याश्रम तथा माधवेश्वर शिव पाञ्चायतन मन्दिरलाई आर्थिक सहयोग गरेको छ ।
विद्याश्रमले आयोजना गरेको श्रीमद्भागवत सप्ताह एवम् धनधान्याञ्चल विराट ज्ञान महायज्ञमा पुगेर लेडी जेसीजले सोमवार २१ हजार एक सय रुपैयाँ सहयोग गरेको हो ।
महायज्ञ परिसरमा आयोजित संक्षिप्त कार्यक्रमका बीच वीरता लेडी जेसीज सन् २०२५ की अध्यक्ष निशा शाक्यले माधव संस्कृत विद्याश्रम एवम् माधवेश्वर शिव पाञ्चायतन मन्दिरका अध्यक्ष तिलक गिरीलाई उक्त रकम हस्तान्तरण गरेकी हुन् ।
लेडी जेसीजले हस्तान्तरण गरेकोमध्ये उपाध्यक्ष एलिना रिजालको दिदी एनि ओलीको जन्मदिनको उपलक्ष्यमा १० हजार प्राप्त भएको हो । बाँकी रकम अध्यक्षलगायत कार्यसमितिबाट संकलन गरिएको जनाइएको छ ।
सहयोग हस्तान्तरण कार्यक्रममा लेडी जेसीजकी पूर्व अध्यक्ष संगीता चिमरियालगायत बोर्डका पदाधिकारी तथा सदस्यहरुको उपस्थिति रहेको थियो । रकम हस्तान्तरणसँगै विद्याश्रमबाट वीरता लेडी जेसीजले आजीवन सदस्यता प्राप्त गरेको छ ।
सदस्यतासम्बन्धी प्रमाणपत्र अध्यक्ष गिरीले प्रदान गरेका थिए । विद्याश्रमको आयोजनामा फागुन ७ गतेदेखि १४ गतेसम्म संचालन भइरहेको विराट ज्ञान महायज्ञमा युवा पण्डित हरिकृष्ण भण्डारीले कथावाचन गरिरहेका छन् । महायज्ञको प्रा.डा. पुरुषोत्तम स्वामीजीले उद्घाटन गरेका थिए ।
