बिर्तामोड, चैत १० ।झापाको बिर्तामोड नगरपालिका ३ सैनिकमोडका होटलमा आइतवार अनुगमन गरिएको छ ।
बिर्तामोड नगर उप–प्रमुख नगेन्द्रप्रसाद संग्रौलाको संयोजकत्वमा जिल्ला प्रशासन कार्यालय, खाद्य तथा गुण नियन्त्रण विभाग, होटल व्यवसायी संघ, विर्तामोड उद्योग वाणिज्य संघलगायतको टोलीले संयुक्तरुपमा अनुगमन गरेको हो ।
अनुगमनका क्रममा अधिकांश होटलहरुमा दर्ता नविकरण नभएको पाइएको छ । १० वटा होटलमा अनुगमन गर्दा ९ वटामा नविकरण नभएको पाइएको नगर उप प्रमुख नगेन्द्रप्रसाद संग्रौलाले जानकारी दिए । नविकरण नभएकाहरुलाई तुरुन्त नविकरण गर्न आग्रह गरिएको छ । बिर्तामोडका अन्य होटलहरुमा पनि चाँडै अनुगमन गर्ने उप प्रमुख संग्रौलाले बताए । उनले आवश्यक मापदण्डको पालना र दर्ता नविकरण अनिबार्य गर्न सबैलाई आग्रह गरेका छन् ।
अनुगमनका क्रममा म्याद गुज्रिएका पेय पदार्थ, लेवल नलगाइएका खाद्य उत्पादनसमेत फेला परेका छन् । सिटी होटल एण्ड गेस्ट हाउसमा भने किचन अत्यन्तै फोहोर पाइएको होटल व्यवसायी संघ अध्यक्ष इन्दिरा श्रेष्ठले बताइन् । होटललाई किचन तत्काल सुधार गर्न पत्र दिएको उनले जानकारी दिएकी छन् ।
अनुगमनमा नगर उप प्रमुख संग्रौला, वडाध्यक्ष मदन बुढाथोकी, होटल व्यवसायी संघ अध्यक्ष इन्दिरा श्रेष्ठ, महासचिव शिव पौडेल, जिल्ला प्रशासन कार्यालयका प्रतिनिधि हरि खतिवडा, खाद्य तथा गुण नियन्त्रण विभागका सुवास वस्ती, बिर्तामोड नगरपालिकाका राजश्व शाखा प्रमुख पदमराज घिमिरे, बिर्तामोड उद्योग वाणिज्य संघका सदस्य केदार खनाललगायतको सहभागिता रहेको थियो ।
