झापा, बैशाख ५ । सुनसरीको कोशी गाउँपालिका–६ मा हिजो आगलागी हुँदा ६० लाख बराबरको क्षति भएको छ ।
गाईवस्तुको झिङ्गा र लामखुट्टे धपाउन बालेको आगो (घुर) ले आगलागी हुँदा पाँच परिवरका १० वटा घर जलेर नष्ट भएको थियो । जसमा ६० लाख बराबरको क्षति भएको स्थानीय वीरेन्द्रकुमार यादवले बताए।
स्थानीय बाबुनन्द गोइत, रमानन्दराम यादव, मनोज यादव, खुशीलाल गोइत र विजय गोइतको घर जलेर नष्ट हुँदा ६० लाख बराबरको क्षति भएको उनले बताए। आगलागीमा स्थानीय बाबुनन्द गोइतको एक लाख नगद नै जलेर नष्ट भएको छ ।
त्यसैगरी, आगलागीमा घरभित्र रहेका फर्निचरसहित सम्पूर्ण सामग्री, सुनचाँदीलगायत जलेर नष्ट भएको जिल्ला प्रहरी कार्यालयका सहायक प्रवक्ता तथा प्रहरी निरीक्षक दिनेश अधिकारीले जानकारी दिए।
स्थानीय बाबुनन्दको घरबाट आगलागी शुरु भएको थियो । नेपाल प्रहरी, सशस्त्र प्रहरी, स्थानीयवासी, कोशी गाउँपालिकाको बारुणयन्त्रको सहयोगमा आगो निभाइएको जिल्ला प्रहरी कार्यालयले जनाएको छ ।
