कुमरखोद, फागुन २३ । झापा गाउँपालिकाले ६३४ विद्यार्थीहरुलाई छात्रवृत्ति वितरण गरेको छ ।
झापा गाउँपालिकाभित्र रहेका सामुदायिक विद्यालयमा अध्ययनरत कक्षा ११ र १२ का विद्यार्थीहरुलाई जनही ९ हजार २ सय पचासका दरले छात्रवृत्ति वितरण गरिएको हो । झापा गाउँपालिकामा कक्षा १२ सम्म पढाइ हुने २ वटा सामुदायिक विद्यालय मात्र रहेका छन्। एउटा वडा नं ४ को डिल्लीराज मावि टाँघनडुब्बा र अर्को वडा नं ६ को जनता मावि शरणामतीमा रहेको छ । डिल्लीराज माविको कक्षा ११ मा १९६ र कक्षा १२ मा १४८ जना गरी कुल ३४४ जना विद्यार्थी अहिले अध्ययनरत छन् । त्यसैगरी जनता मावि शरणामतीमा कक्षा ११ मा १४७ र कक्षा १२ मा १४३ जना गरी जम्मा २९० जना विद्यार्थीहरु अध्ययनरत रहेका छन् ।
झापा गाउँपालिकाले आर्थिक वर्ष २०७८–७९ को वार्षिक बजेटबाट नै छात्रवृत्ति कार्यक्रमलाई स्वीकृत गरेको थियो । रकम अभावका कारण कुनै पनि अभिभावकले आफ्ना छोराछोरीलाई कक्षा ११ र १२ मा अध्ययन गराउनबाट वञ्चित नहोस् भन्ने गाउँपालिकाको उद्धेश्य रहेको गाउँपालिका अध्यक्ष जयनारायण शाहले बताए । अध्यक्ष शाहले प्रोत्साहनस्वरुप मुस्लिम समुदायका कक्षा ११ र १२ मा पढ्ने छात्राहरुलाई थप वार्षिक १२ हजार रुपैयाँ छात्रवृत्ति दिँदै आएको जानकारी गराए ।
डिल्लीराज माविको सभाहलमा वडा नं ४ का अध्यक्ष राजुजङ्ग भारतीको अध्यक्षतामा भएको कार्यक्रमको प्रमुख अतिथि गाउँपालिका अध्यक्ष शाह रहेका थिए । कार्यक्रममा डिल्लीराज माविका विद्यालय व्यवस्थापन समितिका अध्यक्ष मणिराज गणेश , शिक्षक महासंघका विष्णुमाया सिटौला , डिल्लीराज माविका प्रधानाध्यापक विरेन्द्रप्रसाद गुप्ता , जनता माविका सहायक प्रअ टिकाप्रसाद कट्टेल, अभिभावक संघका अध्यक्ष कलाम शेखलगायतले बोलेका थिए । देवेन्द्रचन्द्रसिंह राजवंशीले संचालन गरेका कार्यक्रममा स्वागत मन्तव्य झापा गाउँपालिका शिक्षा प्रमुख जीवनप्रसाद ढकालले गरेका थिए ।
