झापा, पुष २ । कोशी प्रदेशको सभामुखमा राप्रपाले प्रमुख सचेतक तथा केन्द्रीय सदस्य अमरबहादुर विष्टलाई अघि सार्ने भएको छ ।
कोशी प्रदेशसभा सचिवालयले सभामुख चयनको तयारी थालिरहँदा राप्रपाले सो पदमा दावी गर्दै विष्टलाई अगाडि सार्ने निर्णय गरेको हो । । राप्रपा संसदीय दलका नेता भक्तिप्रसाद सिटौलाले सभामुख पद राप्रपाले लिने छलफल भइरहेको बताएका छन् । ‘राप्रपाको ६ जना मात्रै प्रदेश सांसद रहे पनि हामीले सभामुख लिएको अवस्थामा सर्वसम्मत नै हुने अवस्था छ,’ उनले भने, ‘सभामुख पदमा प्रमुख सचेतक तथा राप्रपाका केन्द्रीय सदस्य अमरबहादुर विष्टलाई अघि सार्ने निर्णय भइसकेको छ ।’ सिटौलाले राप्रपाले सभामुख र एउटा संसदीय समितिको सभापति लिएर प्रदेश सरकारलाई साथ दिने राप्रपाको तयारी रहेको बताएका हुन् ।
उपसभामुख सिर्जना दनुवारले प्रदेशसभामा प्रतिनिधित्व गर्ने दलका नेताहरुसँग सभामुख चयनका लागि छलफल सुरु गरेको बताएकी छन् । आउँदो पुष ४ गते बस्ने प्रदेशसभा बैठकबाट सभामुख चयन प्रक्रिया सुरु गर्ने तयारीमा प्रदेशसभा सचिवालय जुटेको हो ।
उपसभामुख दनुवारले कार्यव्यवस्था परामर्श समितिमा सभामुख चयन प्रक्रिया सुरु गर्ने सहमति भएकोले अब दलहरुका नेतासँग छलफल गरेर प्रक्रिया अघि बढाउने तयारी गरेको बताइन् ।
एमालेका प्रमुख सचेतक रेवतीरमण भण्डारीले राप्रपालाई प्रदेशसभामा जिम्मेवारी दिन एमाले तयार रहेको बताएका छन् । उनले एमाले वा राप्रपामध्ये एउटा दलले सभामुख र अर्को दलले उपसभामुखको जिम्मेवारी लिएर प्रदेशसभाको नेतृत्व गर्ने बताएका हुन् ।
प्रदेशसभा गठन भएपछि पुष २८ गते सभामुख पदमा निर्विरोध निर्वाचित भएका माओवादी केन्द्रका तत्कालीन सभामुख बाबुराम गौतमले साउन १६ गते पदबाट राजीनामा दिएका थिए । उनी कांग्रेसका नेता उद्धव थापा नेतृत्वको सरकार गठनका लागि बहुमत पुर्याउन प्रधानमन्त्रीसमेत रहेका माओवादी केन्द्रका अध्यक्ष पुष्पकमल दाहालको निर्देशनमा सभामुख पदबाट राजीनामा दिएर आर्थिक मामिला तथा योजना मन्त्रालयको जिम्मेवारी सम्हालेका थिए । उनले सभामुख पदबाट राजीनामा दिएदेखि उपसभामुख दनुवारले प्रदेशसभा सम्हाल्दै आएकी छन् ।
सरकार गठनको अन्तिम विकल्प संविधानको धारा १६८ को उपधारा(५) अनुसार कांग्रेसका ८ विद्रोही प्रदेश सांसद र एमालेका ३९ सांसदको समर्थनमा मुख्यमन्त्री नियुक्त भएका केदार कार्की राप्रपाको साथ लिएर सदनमा बलियो उपस्थिति जनाउने तयारीमा छन् । उनले पनि राप्रपालाई सभामुख र एउटा संसदीय समितिको सभापति दिएर साथ लिने तयारीमा रहेको स्रोतले जनाएको छ ।
