झापा ,पुष १८ । नेपाल उद्योग तथा व्यवसायी महासंघले बिर्तामोड नगरपालिकालाई ज्ञापनपत्र बुझाएको छ ।
कोभिड महामारी र त्यसपछिको आर्थिक मन्दीले व्यवसाय क्षेत्र सम्हाल्न नसक्ने अबस्थामा पुगिसकेको बेला बिर्तामोड नगरपालिकाबाट विशेष राहतको लागि महासंघको बिर्तामोड नगर कमिटीले चार बुँदे मागसहितको ज्ञापनपत्र बुझाएको हो ।
बिर्तामोड नगरपालिकाको अघिल्लो कार्यकालमा बजार क्षेत्रको सौन्दर्यकरण र व्यवस्थापनलाई मध्यनजर गर्दै २ पांग्र्रे र ३ पांग्रे सवारीलाई समेत लैजाने गरी वडा नं. ६ मा अटोल्याण्ड सञ्चालनमा ल्याएकोमा व्यवसायीहरुको माग र बजारको परिस्थिति मध्यनजर गर्दै २ पांग्र्रे र ३ पांग्रे सवारीलाई यथावत स्थानमै रहने गरी नवीकरणको व्यवस्थापन मिलाइदिन ,व्यवसायीको हितका लागि नगरपालिकाले कर छुटमा दिएको समयसीमा कार्तिक मसान्तमा समापन भएको हुँदा उक्त सुविधालाई माघ मसान्तसम्म निरन्तरता दिन, बिर्तामोड नगरपालिकाले सम्पत्ति कर र व्यवसायिक करमा गरेको नयाँ व्यवस्था अव्यवहारिक भएकोले सम्पत्ति कर बुझाएपछि मात्रै व्यवसायिक कर बुझ्ने निर्णयलाई पुनरावलोकन गरी व्यवसाय नविकरण गरिदिन र बिर्तामोड नगरपालिकाको कारोवारका आधारमा व्यवसायिक कर लिने प्रावधान अवैज्ञानिक भएको हुँदा पूँजीको आधारमा कर निर्धारण गर्न माग गरिएको छ ।
नेपाल उद्योग तथा व्यवसायी महासंघ बिर्तामोड नगर कमिटी अध्यक्ष युवराज निरौलाले नगर प्रमुख पवित्रा महतारा प्रसाईलाई सो ज्ञापनपत्र बुझाएका हुन् । त्यस अवसरमा उपप्रमुख नगेन्द्रप्रसाद संग्रौला , प्रमुख प्रशासकीय अधिकृत विनोदकुमार न्यौपानेलगायतको उपस्थिति रहेको थियो । ज्ञापनपत्र बुझाउने टोलीको नेतृत्व गरेका नेपाल उद्योग तथा व्यवसायी महासंघका केन्द्रीय सदस्य तथा बिर्तामोड उद्योग वाणिज्य संघका महासचिव अर्जुनकुमार मैनालीले बिर्तामोड नगरपालिकाको करसम्बन्धी निर्णयले व्यवसायीहरु अप्ठ्यारोमा परिरहेको ध्यानाकर्षण गराए । उनले बिर्तामोड उद्योग वाणिज्य संघ र बिर्तामोड नगरपालिकाबीच दूरी बढ्नु राम्रो कुरा नभएको भन्दै व्यक्तिका कारण सिंगो संस्थासंग दूरी नबढाउन आग्रह गरे ।
ज्ञापनपत्र बुझ्दै नगर प्रमुख प्रसाईले वाणिज्य संघको भूमिका समन्वयकारी हुनुपर्नेमा अराजक शैलीको पाइएको बताइन् । उनले वाणिज्य संघको नेतृत्व सच्चिन जरुरी भएको भन्दै अबको नेतृत्व राम्रो चयन गर्न सुझाव दिइन् । ज्ञापनपत्रमा प्रस्तुत गरिएका मागहरुप्रति आफूहरु सकारात्मक रहेको बताउँदै उनले छलफल गरेर त्यसलाई संबोधन गर्ने आश्वासन दिएकी छन् ।
