झापा, असोज २६ । खोटाङको रावाबेशीमा सेल रोटी पकाउने क्रममा आगलागी भएको छ ।
गएराति ८ बजेको समयमा रावाबेशी –६ बस्ने ३८ वर्षीय हेमकुमार श्रेष्ठको भान्सा घरमा सेल रोटी पकाउने क्रममा अचानक आगलागी भएको हो । आगलागीबाट ढुङ्गा, माटोले बनेको ,फुसको छाना भएको भान्सा घर र घरभित्र रहेको भाडावर्तन, अन्नपातसमेत जलेर पूर्ण रुपमा नष्ट हुँदा अन्दाजी २ लाख बराबरको क्षति भएको प्रहरीले जनाएको छ ।
त्यस्तै हिजो दिउँसो ४.२० बजे उदयपुर कटारी –७ तपीडाँडा बस्ने बिनोद लामाको काठ, बाँसको टाटी र माटोको टाली छानो भएको २ तले घरमा अचानक बिद्युतको तार सर्ट भई आगलागी भएको छ ।
आगलागीबाट घर र घरभित्र रहेका अन्नपात, भाडावर्तन, लत्ताकपडा पूर्ण रुपमा जलेर नष्ट हुँदा अन्दाजी ५ लाख बराबरको क्षति भएको छ । आगलागीबाट बिनोद लामाकी श्रीमती ५० वर्षीया कमला तामाङ घाइते भएकी छन् । दाहिने हात र मुखमा आगोले पोली घाइते भई उनलाई उपचारको लागि कटारी अस्पतालमा भर्ना गरिएको छ । उनको अबस्था मध्यम रहेको प्रहरीले जनाएको छ ।
