झापा, असार १३ । नेत्रहीन संघ झापाले विविध कार्यक्रम गरी हेलेन केलरको १४५औं जन्मजयन्ती र आफ्नो २८औं स्थापना दिवस मनाएको छ ।
बिर्तामोड–३ स्थित आफ्नै सभाहलमा नेत्रहीन संघले कार्यक्रम आयोजना गरेको थियो । सोही अवसरमा कम्प्युटर तालिम समापन तथा हाजिरीजवाफ प्रतियोगिता आयोजना गरिएको थियो।
नेत्रहीन संघका अध्यक्ष होमनाथ राजवंशीको अध्यक्षता तथा बिर्तामोड–३ का वडा अध्यक्ष मदन बुढाथोकीको प्रमुख आतिथ्य रहेको कार्यक्रममा वडा सदस्य हरि बाँस्कोटा, संघका सल्लाहकार प्रेमप्रकाश सिटौला, अनारमनी पब्लिक क्याम्पसका प्रमुख मोहन शिवाकोटी, संयोजक सल्लाहकार द्रोणचार्य निरौला, एचआरडीसी झापा प्रतिनिधि जनक भट्टराई,संघका संस्थापक अध्यक्ष खेम रेग्मीलगायतले शुभकामना मन्तव्य राखेका थिए।
वडा अध्यक्ष बुढाथोकीले संघलाई वडा कार्यालय तथा नगरपालिकाका तर्फबाट निरन्तर सहयोग गरिएको बताउँदै आगामी दिनमा पनि साथ रहने प्रतिबद्धता जनाए। यस्तै, अनारमनी पब्लिक क्याम्पसका प्रमुख शिवाकोटीले संघको अक्षयकोषमा २५ हजार रुपैयाँ सहयोग गर्ने र नेत्रहीनहरुले तयार पारेका पचास वटा कुचो खरिद गरिदिने घोषणा गरे।
कार्यक्रममा अध्यक्ष राजवंशीले बिर्तामोड नगरपालिकाले गरेको सहयोगप्रति आभार व्यक्त गर्दै अन्य पालिकाबाट पनि सहयोग प्राप्त भए दृष्टिविहीनहरुको विकासमा ठूलो टेवा पुग्ने धारणा राखे।
हाजिरीजवाफ प्रतियोगितामा बिर्तामोड, हल्दीबारी, कमल, कचनकवल, भद्रपुर र गौरादहका प्रतिनिधिहरूले भाग लिएका थिए। प्रतियोगितामा बिर्तामोड प्रथम भई नगद रु. पाँच हजार, हल्दीबारी द्वितीय भइ रु. तीन हजार, र कमल तृतीय भइ रु. दुई हजार पुरस्कार प्राप्त गरे। प्रतियोगिता पवन गिरीले सञ्चालन गरेका थिए भने पुरस्कार अध्यक्ष राजवंशीलगायतले बितरण गरे।
कार्यक्रममा उपाध्यक्ष उत्तम खतिवडाले स्वागत मन्तव्य, संस्थापक अध्यक्ष खेम रेग्मीले हेलेन केलरको जीवनीमाथि प्रकाश र पवित्रा तामाङले स्वागत नृत्य प्रस्तुत गरेका थिए। कार्यक्रमको सञ्चालन सचिव दिलकुमार राजवंशीले गरेका थिए ।
