एजेन्सी । कर्नाटक सरकारले शैक्षिक संस्थाहरूमा हिजाबमाथि प्रतिबन्ध लगाउने आदेश दिएपछि ठूलो संख्यामा मुस्लिम विद्यार्थीहरू अब सरकारी कलेजहरूको सट्टा निजी कलेजहरूमा सरेका छन् ।
अंग्रेजी अखबार द इन्डियन एक्सप्रेसले तथ्यांकलाईउद्धृत गर्दै यो विशेष रिपोर्ट प्रकाशित गरेको छ । गत वर्ष हिजाब विवादको केन्द्र बिन्दु बनेको कर्नाटकको उडुपी जिल्लामा सरकारी कलेजमा भर्ना भएका मुस्लिम विद्यार्थीको संख्या एक वर्षमा आधाभन्दा कममा झरेको छ । सन् २०२१ देखि २२ को बीचमा कक्षा ११ (कर्नाटकमा प्रि-युनिभर्सिटी कलेज पियुसी पनि भनिन्छ) मा कुल १,२९६ विद्यार्थी भर्ना भएका थिए । सन् २०२२-२३ मा यो संख्या एक हजार ३२० थियो। सन् २०२१-२२ को सत्रमा सरकारी कलेजहरूमा कक्षा ११ मा ३८८ मुस्लिम विद्यार्थी भर्ना भएका थिए, जुन २०२२-२३ सत्रमा घटेर १८६ मा झरेको थियो। प्रतिवेदनअनुसार सन् २०२१-२२ को सत्रमा १७८ जना मुस्लिम छात्रा सरकारी कलेजमा भर्ना भएका थिए भने चालु सत्रमा ९१ जना मात्र मुस्लिम छात्रा सरकारी कलेजमा भर्ना भएका छन् । त्यस्तै, सरकारी कलेजमा भर्ना हुने मुस्लिम केटाहरूको संख्या पनि २१० बाट घटेर ९५ मा झरेको छ । यसको विपरीत उडुपी जिल्लामा निजी वा गैरसरकारी कलेजहरूमा भर्ना हुने मुस्लिम विद्यार्थीहरूको संख्या बढेको छ । सन् २०२२-२३ मा मुस्लिम समुदायका ९२७ विद्यार्थी पियुसीमा भर्ना भएका थिए भने अघिल्लो वर्ष ६६२ विद्यार्थी भर्ना भएका थिए । योसँगै मुस्लिम केटाको संख्या पनि ३३४ बाट बढेर ४४० पुगेको छ भने बालिकाको संख्या ३२८ बाट बढेर ४८७ पुगेको छ । उडुपीस्थित सालिहाथ ग्रुप अफ एजुकेसनका प्रशासक असलम हेकडीले द इन्डियन एक्सप्रेससँग कुरा गर्दै भने, ’हाम्रो पियु कलेजमा पहिलोपटक मुस्लिम केटीहरूको संख्या लगभग दोब्बर भएको छ । यसले हिजाबको मुद्दाले उनलाई व्यक्तिगत र शैक्षिक रूपमा कसरी प्रभावित गरेको छ भन्ने देखाउँछ ।’
