दमक, साउन १९ । नेपाल आदिवासी जनजाति महासंघले झापामा यस वर्ष भव्य रुपले विश्व आदिवासी दिवस मनाउने तयारी गरेको छ ।
महासंघ झापा जिल्ला समन्वय परिषदले शुक्रवार दमकमा पत्रकार सम्मेलन गरी पहिचानको आन्दोलनस्वरुप यहि साउन २४ गते मनाईने २९ औ विश्व आदिवासी दिवस यस वर्ष झापामा भव्य रुपले मनाउने तयारी तीव्र पारिएको जनाएको हो ।
महासंघका अध्यक्ष पाण्डवलाल चौधरीका अनुसार यस वर्ष विश्व आदिवासी दिवस झापाको कमल ५ पाडाजुंगीस्थित आदिवासी रंगशालामा विभिन्न कार्यक्रम गरि भव्य रुपले मनाउने तयारी गरिएको छ । उनले यस दिवसलाई पहिचानको आन्दोलनका रुपमा मनाउने तयारी गरिएको बताए ।
जिल्लास्तरीय सो कार्यक्रम भव्यताका साथ सम्पन्न गर्न महासंघ जिल्ला अध्यक्ष चौधरीको अध्यक्षतामा मूल आयोजक समितिसहित विभिन्न ११ वटा उपसमितिहरु गठन गरि तयारी तीव्र पारिएको महासंघ झापाका पूर्व अध्यक्ष पारसमणि राईले जानकारी दिए ।
संघीय सरकारका नागरिक तथा पर्यटन मन्त्री सुदन किरातीको प्रमुख आतिथ्यतामा हुने कार्यक्रममा समाजशास्त्री डा. कृष्णबहादुर भट्टचन, लाहुर्निपका उपाध्यक्ष शंकर लिम्बूलगायतका अगुवाहरु मुख्य वक्ताका रुपमा रहने साथै विभिन्न जातजातिका झाँकीहरु समेत प्रस्तुत गरिने कार्यक्रम रहेको छ ।
त्यस्तै, कार्यक्रमलाई थप आकर्षण बनाउन भारत सिक्किमका आदिवासी संस्था र आयोजकबीच मैत्रीपूर्ण फूटबल समेत सञ्चालन गरिने महासंघ झापाका पूर्व अध्यक्ष राईले जनाएका छन् ।
पत्रकार सम्मेलनमा आदिवासी रंगशालाका महासचिव दिपेनवाला राई, किरात याक्थुङ चुम्लुङका जिल्ला अध्यक्ष शेसेहाङ फियाक, नेपाल आदिवासी जनजाति महासंघ कमल समन्वय परिषदका अध्यक्ष बद्री राईलगायतले विश्व आदिवासी दिवसको महत्वका विषयमा बोलेका थिए ।
