झापा , पुष १० । अर्जुनधारा ११ का प्रेमप्रसाद सिग्देलले आफूखुशी गिरीबन्धु टी इस्टेटको चिया बगान फाडेर भोगचलन गर्न थालेका छन् ।
चिया बगानको जग्गा आफ्नो भएको दावी गर्दै सिग्देल परिवारले शुक्रवार जेसीवी लगाएर गिरीबन्धु टी इस्टेटको १४ कठ्ठा चिया बगान फाडेका हुन् । सिग्देलले गत मंसिर २९ गते नापी कार्यालय भद्रपुरबाट सरकारी अमिन प्रमोद अधिकारीलाई बोलाएर नापजाँच गरेका थिए । सरकारी अमिन बोलाएर नापजाँच गर्दा सँधियारको रुपमा रहेका गिरीबन्धु टी इस्टेटका संचालकलाई बोलाइएको थिएन । उनीहरुले आफूखुशी नापजाँच गरेर किल्ला गाडेका थिए भने प्रतिवादीको उपस्थिति बिना नै अमिन अधिकारीले सर्जमिन मुचुल्का बनाएका थिए । अर्जुनधारा ११ का वडा सदस्य पूर्णबहादुर राईको रोहवरमा तयार गरिएको मुचुल्कामा सिताराम श्रेष्ठ , अर्जुनबहादुर राई , सन्तकुमार राई , कृष्ण कडरिया र इन्द्रप्रसाद कडरियाले साक्षीको रुपमा हस्ताक्षर गरेका छन् । त्यही मुचुल्काको आधारमा सिग्देल परिवारले गिरीबन्धु टी इस्टेटको चिया बगान फाडेका हुन् । आफूलाई थाहै नदिई जग्गा नापजाँच गरेको र चियाबगान फाडेको गिरीबन्धु टी इस्टेटका संचालक छत्र गिरीले बताए । आफ्नो पाँच करोडभन्दा बढी क्षति भएको भन्दै उनले क्षति गर्नेहरुविरुद्ध उजुरी दिने तयारी गरिएको बताए । सिग्देल परिवारले गिरीबन्धु टी इस्टेटको ४ हजार चियाको बोट र पाँचवटा सिरिसको बोट ढालेको जनाइएको छ ।
अर्काको जग्गामा आफ्नो जग्गा परेको खण्डमा सरकारी अमिन ल्याएर सम्बन्धित सँधियारको रोहवरमा नापजाँच गर्ने र मुचुल्का तयार गर्ने गरिन्छ । त्यस नापजाँचप्रति चित्त नबुझेको खण्डमा मुचुल्कामा हस्ताक्षर नगरी ती सँधियारले आफ्नो तर्फबाट अर्काे अमिन बोलाउन पाउने अधिकार रहन्छ । आफूलाई खबरै नगरी भूमाफियाहरुले चिया बगान फाडेको गिरीबन्धु टी इस्टेटका संचालक गिरीले बताए ।
सिग्देलले २०५२ सालमा अर्जुन राई अध्यक्ष रहेको सुकुम्बासी आयोगबाट १८ कठ्ठा ऐलानी जग्गा आफ्नो नाममा पारेको बताइएको छ । त्यही जग्गा खोज्दै उनले गिरीबन्धु टी इस्टेटको बगान फाडेका हुन् । उत्तरतिरबाट जापजाँच गर्दा सिग्देलको जग्गा बगानभित्र परेको देखिएपनि दक्षिणतिरबाट नापजाँच गर्दा सिग्देलले फाँडेको ठाउँबाट ११० मिटर उत्तरसम्म चिया बगानको जग्गा पर्ने देखिएको एक सरकारी अमिनले बताएका छन् । आफूलाई कुनै जानकारी नदिई सर्जमिन मुचुल्कामा रोहवर बस्न लगाएको अर्जृुनधारा ११ का वडा सदस्य पूर्णबहादुर राईले बताए ।
