बिर्तामोड, भदौ २५ । बिर्तामोड नगरपालिका वडा नम्बर १ का वडा सचिव टिका अधिकारीलाई विदाई गरिएको छ ।
वडा कार्यालयमा आज आयोजित स्वागत, सम्मान तथा विदाई कार्यक्रमका विच वडा सचिव अधिकारीलाई विदाई गरिएको हो ।
वडा सचिव अधिकारीको बिर्तामोड नगर अस्पतालमा प्रशासन प्रमुखमा सरुवा भएको छ । यस्तै वडा नम्बर १ को वडा सचिवमा जानुका बस्नेतले जिम्मेवारी प्राप्त गरेकी छन् । बस्नेत एक महिनाअघि अर्जुनधारा नगरपालिकाबाट सरुवा भएर बिर्तामोड आएकी हुन् । उनलाई जनप्रतिनिधि तथा बिभिन्न टोल विकास संस्थाका प्रतिनिधिहरुले फूलमालाले स्वागत गरेका छन् ।
यसैबीच उत्कृष्ट कर्मचारीलाई सम्मान गरिएको छ । वडाकी कम्प्युटर अपरेटर डिना काफ्लेलाई वर्ष उत्कृष्ट कर्मचारीको रुपमा नगदसहित सम्मान गरिएको हो । अपरेटर शर्मालाई वडाध्यक्ष अग्निप्रसाद पाण्डेले ५ हजार रुपैयाँसहित सम्मानपत्र प्रदान गरे ।
कार्यक्रममा वडाबाट नगर अस्पताल सरुवा भएकी अधिकारीलाई वडाध्यक्ष पाण्डेसहित जनप्रतिनिधि तथा कर्मचारीको तर्फबाट प्रशंसापत्रसंगै मायाको चिनो प्रदान गरिएको थियो ।
वडा सदस्य योगचन्द्र आङ्वोहाङले स्वागत गरेको कार्यक्रममा नेकपा एमालेका सुनिल शिवाकोटी, नेपाली कांग्रेसकी तिलरुपा श्रेष्ठ, राष्ट्रिय स्वतन्त्र पार्टीका बालकृष्ण निरौला, राप्रपाका जनक खड्का, संघ संस्थाका तर्फबाट भोजकुमारी खनाल, ओमनाथ अधिकारी , डिल्लीमाया आचार्य, निवर्तमान वडा सदस्य प्रेमकुमार खरेललगायतले बोलेका थिए ।
