झापा, असोज १ । सशस्त्र प्रहरी बल, नेपालले लागूऔषधसहित दुई जनालाई पक्राउ गरेको छ ।
सशस्त्र प्रहरी बल, नेपाल बोर्डर आउट पोष्ट टाघनडुब्बाबाट सशस्त्र प्रहरी सहायक निरीक्षक निर्मलकुमार कटुवालको कमाण्डमा खटिएको चेकप्वाइन्ट टोलीले लागूऔषध ब्राउनसुगरसहित कमल गाउँपालिका–७ बस्ने बर्ष २५ का सन्देश लिम्बू र सोही ठाउँ बस्ने बर्ष ३६ का पूर्णबहादुर लिम्बूलाई झापा १ लसुना सीमा इलाकाबाट पक्राउ गरेको सशस्त्र प्रहरी बलले जनाएको छ ।
मंगलवार बेलुकी ७ः५० बजे भारतबाट नेपालतर्फ आउँदै गरेको मे ५ प ७८४० नम्बरको स्कुटरलाई शंका लागेर खानतलासी गर्ने क्रममा स्कुटरको भाइजरमा लुकाएर ल्याएको अवस्थामा ९.७९० ग्राम ब्राउनसुगर फेला परेको थियो । उनीहरुलाई नियन्त्रणमा लिई आवश्यक कारबाहीको लागि नेपाल प्रहरीलाई बुझाउने प्रक्रियामा रहेको सशस्त्र प्रहरी बल, नेपाल नं. २ गण झापाका सूचना अधिकारी एवं निमित्त गणपति सशस्त्र प्रहरी नायव उपरीक्षक सुमन पोख्रेलले जानकारी दिएका छन् ।
