बिर्तामोड , असार २८ ।बिर्तामोड नगरपालिकाले वडा नम्बर ५का वडा सचिव विमल पोखरेललाई स्पष्टीकरण सोध्ने निर्णय गरेको छ ।
नगर प्रमुख पवित्रा महतारा प्रसाईको अध्यक्षतामा बिहीवार बसेको नगर कार्यपालिकाको बैठकले वडा सचिव पोखरेल निर्धारित समयमा कार्यालयमा उपस्थित नहुने, कार्यालयमा पटक पटक ढिलो आउने, चाँडो जाने तथा कार्यालय समयमा कार्यालयको कामबाहेक स्वीकृति नलिई कार्यालय छोड्ने जस्ता विषयमा स्पष्टीकरण सोध्ने निर्णय गरेको हो ।
बैठकले सचिव पोखरेलको ई–हाजिरी तथा हाजिरी पुस्तिकाबाट आवश्यक अभिलेख लिई स्वीकृति बिनाको अनुपस्थिति, विदा, आवश्यक हुनुपर्ने कार्यालय समयावधिको हिसाव गरी निजामती सेवा नियमावली २०५० को नियम ५५ बमोजिम नपुग समयको गयलकट्टी गर्ने समेत निर्णय गरेको छ ।
यससंगै बैठकले कर्मचारीहरुको आन्तरिक स्थानान्तरण र व्यवस्थापनका सम्बन्धमा समेत आवश्यक छलफल गरेको छ । वडा नम्बर ५मा अब अर्कै वडा सचिवले कामकाजको जिम्मा पाउने छन् । नगरभित्रकै कुनै वडाबाट एक जना सचिव उक्त वडामा पठाउने तयारी रहेको नगरपालिकाले जनाएको छ ।
वडा सचिवले समयको पालना नगरेर वडाको दैनिक प्रशासनिक काम कार्वाहीमा असर परेको भन्दै वडाध्यक्ष रोहित प्रसाईले गत मंगलबारदेखि नगरपालिकाको कार्यालय अगाडी टेवल कुर्सी राखेर धर्ना सुरु गरेका थिए ।
वडाध्यक्ष प्रसाईले बिहीवारको बैठकले माग सुनुवाई गरेका कारण धर्नाको कार्यक्रम स्थगित भएको प्रतिक्रिया दिए। उनले शुक्रवारदेखि वडा कार्यालयबाटै सेवा प्रदान गरिने बताए ।
कार्यापालिका बैठकले अन्य कर्मचारीहरुले पनि कार्यालय समय र नियमितताको परिपालना गरे नगरेको जाँचबुझ गरि नभएको पाईए आवश्यक कार्बाही गर्ने निर्णय गरेको छ ।बैठकमा विकास निर्माण, नगरपालिका क्षेत्रमा वर्षाले पारेको असरलगायत विभिन्न विषयमा पनि छलफल भएको थियो ।
