बिर्तामोड , असोज २६ । बिर्तामोड नगरपालिकाले आज पेट्रोल पम्पहरुको अनुगमन गरेको छ ।
नगर उपप्रमुख तथा उपभोक्ता हित संरक्षण समितिका संयोजक नगेन्द्रप्रसाद संग्रौलाको संयोजकत्वमा बजार क्षेत्रमा रहेका पम्पहरुको अनुगमन गरिएको हो ।
अनुगमनका क्रममा अधिकांश पम्पहरुमा रहेका सार्वजनिक शौचालयहरु फोहोर रहेको पाईएको छ । सफा नगरिएको, पानीको व्यवस्थापन नभएको, पानी जमेको लगायतका समस्या रहेको पाईएको हो ।
नगरमा व्यवसाय नवीकरण नगरेको, मूल्यसूची सबैले देख्ने ठाउँमा नराखेको, मूल्यसूची परिवर्तन नगरेको, नागरिकले देख्नेगरि सार्वजनिक शौचालय लेखेको स्पष्ट बोर्ड नराखेको, अग्नी नियन्त्रक सामग्रीको म्याद गुज्रिएको लगायतका समस्या पम्पहरुमा फेला परेको नगर उपप्रमुख संग्रौलाले बताए । समस्या देखिएका पम्पहरुलाई ३ दिनभित्र आवश्यक कागजपत्र सहित नगरपालिकामा हाजिर हुन निर्देशन दिएको उपप्रमुख संग्रौलाले जानकारी दिए ।
अनुगमन टोलीले देखिएका समस्या समाधानका लागि सबै पम्प संचालकहरुलाई सुझाब दिएको छ । बसपार्कदेखि चारपानेसम्म रहेका पेट्रोल पम्पहरुको अनुगमन गरिएको हो ।
अनुगमनमा उप प्रमुख संग्रौला, वडाध्यक्षहरु अग्निप्रसाद पाण्डे, किशोर पौडेल, राहुल शर्मा, रोहित प्रसाई, कार्यपालिका सदस्य तिला गौतम, उपभोक्ता हित संरक्षण मंचका अध्यक्ष मदनगोपाल सुव्वा, नगरपालिकाका राजश्व शाखा प्रमुख पदम घिमिरे, बिर्तामोड उद्योग वाणिज्य संघका कार्यालय सचिव राजु गौतम, वडा सदस्य चेतन बिमली, कर्मचारीहरु शम्भु साह, दिपेश गणेशलगायत प्रहरी,संचारकर्मीहरुको सहभागिता रहेको थियो ।
