झापा,मंसिर ३० । संयुक्त राज्य अमेरिकाको भर्जिनियास्थित एक विद्यालयकी शिक्षकमाथि ६ वर्षीय विद्यार्थीले गोली प्रहार गरेको घटनामा विद्यार्थीकी आमालाई २ वर्षको जेल सजाय भएको छ । भर्जिनियाको न्युपोर्ट न्युजस्थित रिचनेक एलिमेन्टरी स्कूलकी शिक्षक अविगेल ज्वेर्नरमाथि ६ वर्षीय बालकले कक्षाकोठाभित्रै गोली प्रहार गरेको घटनामा बालककी आमा २६ वर्षीया डेजा टेलरलाई त्यहाँको अदालतले २ वर्षको जेल सजाय सुनाएको हो। शुक्रबार सर्किट अदालतका न्यायाधीश क्रिस्टोफर पपिलले टेलरले आफ्नो सन्तानको राम्रो हेरचाह नगरेको भन्दै उनलाई २ वर्षको जेल सजाय सुनाएका हुन । कक्षाकोठामै गोली प्रहार भएपछि ज्वेर्नर गम्भीर घाइते भएकी थिइन्। उनको छातीमा गोली लागेको थियो। उनको पाँच पटक सर्जरी गरिएको थियो। घटनापछि उनी अत्यन्तै विक्षिप्त र मानसिक रूपमा कमजोर बनेकी बताइएको छ। ६ वर्षीय बालकसँगको सोधपुछमा उनले आफ्नी आमाले दराजको माथिल्लो भागमा राखेको बन्दुक झिक्न आफू ड्रयरमा चढेको बताएका छन्। त्यसपछि स्कुल जाँदा झोलामा राखेको र कक्षाकोठामा पुगेपछि पाइन्टको गोजीमा राखेको बताए।उनकी आमाले बन्दुकको ट्रिगर लक गरेर राखेको बताएपनि अनुसन्धानका क्रममा झुट ठहरिएको थियो।टेलरलाई यसअघि गएको नोभेम्बरमा मात्रै २१ महिनाको सजाय सुनाइएको थियो।
