झापा, मंसिर १३ । सुनसरीको इटहरीमा स्कुटर र मोटरसाइकल एकापसमा ठोक्किदा एकजनाको मृत्यु भएको छ । दुर्घटनामा तीनजना घाइते भएका छन् ।
आज साँझ ५.२० बजे इटहरी उपमहानगरपालिका–१३ काली मन्दिर अगाडी कोशी लोकमार्गमा इटहरीबाट बिराटनगरतर्फ जाँदै गरेको प्र१–०२–०५६प ७५५६ नं. को मोटरसाइकल र दुहबीबाट खनारतर्फ आई पूर्वतर्फ बाटो क्रस गर्दै गरेको मे ४ प ८९१ नं. को स्कुटर एक आपसमा ठक्कर खाई दुर्घटना भएको थियो । दुर्घटनामा मोटरसाइकल चालक सुनसरी कोशी ८ बस्ने बर्ष २६ का आशिक आलम र पछाडि सवार इटहरी १४ बस्ने बर्ष अन्दाजी २५की बिनिता पाठक गम्भीर घाइते भई दुबै जनालाई उपचारको लागि बिराटनगरस्थित गोल्डेन हस्पिटल लगिएको थियो ।
त्यस्तै स्कुटर चालक इटहरी १३ बस्ने बर्ष ५४ का गोपाल रिजाल र स्कुटरमा सवार सोही ठाउँ बस्ने बर्ष ३३ की बबिता रिजाल पनि घाइते भएका थिए । दुबै घाइतेलाई उपचारको लागि बिराटनगरस्थित बिराट टिचिङ हस्पिटल लगिएको थियो । उपचारका क्रममा स्कुटर चालक रिजालको साँझ ६ बजे मृत्यु भएको प्रहरीले जनाएको छ ।
